Tuug Baroole waa gabay cusub oo ka hadlaya badda la bixiyay iyo khayaanada qaran

Published: August 7, 2011

Gabaygaan la magac baxay TUUG BAROOLE waxaan tiriyay markii aan ka war helay in ay niman Soomaali sheeganaya Kenya heshiis kula galeen in Kenya loo ogolaado in ay qaadato qaybo ka mid ah badda Soomaaliyeed. Nimankaas waxay wax ku saxiixeen magac dawladda ku meelgaarka ah. Arintaa waxaan maqlay 10/04/2009 goor galab ah, habeenkii ayaan ka seexan waayay xannuunka ay arintaas igu beertay, waxayna noqotay adduunka intaan ku noolaa war ay dhagahaygu maqlaan kii iigu tiiraanyo badnaa. Markaas ayuu gabaygani igu soo dhacay.

Cabdi Ibrahim Magan( Cirjiir)

Barfasooradaan aaminee buugagga u dhiibnay
Baldadaha raggii wada sitiyo suudhadhkiyo baylka
Baalxooftadii hore raggii loo birdhigi waayay
Bakhti iyo nijaastay faleen beerku ii gubaye

Barbarreeyayeey xalay miyaan jiifka bogan waayay
Biixida miyaan ooga jabay cadow i boobaaya
Bahalkii Wajeer cunay miyaa baylah iga qaatay

Baran maysid soomaaliyeey tuug baroolaha e
Sidii ruux barii\’uu dushaa uga bidhaamaaye
Bashar iyo qof saaxiib ah baad bilicda mooddaaye

Mar waa sheekh billaahida maroo diinta kaa badine
Marna waa basaas horor ah oon baab xidhaa jirine
Boqor iyo suldaan buu noqdaa beelo daaja ahe

Baryo wuxuu iskaga kaa dhigaa naasax beernugule
Waa baxar sitiin aan lahayn baasaboor mida e
Kolba boqol ilood buu middood kuula soo bixiye

Sidii ruux baldo u dhoofayuu boorsa wayn yahaye
Danta inuu badbaada u yahuu ba\’uhu sheegtaaye
Bidix iyo markuu midig dayee kaa bogsado shiishka
Billaawaha wuxuu kaa marshaa meesha baydda ahe

Kuwii shalay dadwaynuhu baxshee shacabka boobaayay
Hunguraa baleeyiyo waxay bililiqaystaane
Bal ogoow dalkoodiyo inayn hoyga badar dhaafsan

ummad yahay baddii aad lahayd boojisyaa helaye
Inta aysan baaqiga hadhiyo dhulalka beecgaynin
Ma baraarugtaan ciiddu waa birimadeenniiye

FURAHA EREYADA
barbarrayn:dhinacyayn,isrogrogid
biixida:bawdada, laxaadka
bahal:waraabe,dugaag
wajeer:dagmada wajeer
barii\’:dambi la\’aan ah, aan waxba gaysan
naasax:daacad ah
baldo:waddamo, magaalooyin
baydda:dhuunta,halista
boojis:qawlaysato,budhcad
Birimo:waxa ugu mudan,muhiimsan
baadil:dambi
baldad:suudh


KismaayoNews.com



UGU DAMBEEYEY
Ergada shirka maamulka 3-da gobol oo Baydhabo gaaraya
Kooxda Monitoring ee UN oo shaqada laga eryey
Muuse Ganjab oo soo saaray war saxaafadeed kaga jawaabayo eedeymihii Monitoring Group
Xarunta ganacsiga Jubba “Dhuxulna ma dhoofino, hubna masoo dajino”
Baraha baroorsinka maraakiibta dekefa Xamar oo la balaarinayo