KN : Waxaa hoostaga 11 tuulo, waxay leedahay Iskuul, idbitaal iyo dhamaan adeegyada bulshada, waxay ahayd tuulo ka tirsan gobolka Hiiraan, haatan waxay u dalacday darajada degmo ka tirsan Hiiraan, Xarakada Alshabaab ayaa maamuuskaasi siiyey Ceel-Cali

Haddii Puntland iyo Somaliland ay gobolo u magacaabi karaan 20km oo isku wareeg ah, sida Karkaar iyo Saaxil, maxaa diidaya in Ceel-Cali oo 11 tuulo xukunta ay u noqoto degmo?

Mas’uulka Alshabaab u qaabilsan arrimaha Siyaasada Sh. Cali Fiidoow iyo dadweyne kale ayaa ka qeyb galay munaasabada Ceel-Cali lagu caleemo saarayay, wuxuu mas’uulka sheegey in wixii maanta ka bilowda ay Ceel-Cali tahay degmo ka tirsan gobolka Hiiraan.

Caadi ahaan magaalada qaadanaysa darajada degmo waxay taasi ku timaadaa tirakoob lagu sameeyo dadka deegaankaasi ku nool oo ay tahay in tirro cayiman ay gaaraan, dhaqaalaha ay degmadaasi leedahay oo ay isugu filnaan karto, iyo in ay leedahay adeegyada asaasiga ah ee dadweynaha.

Ceel-Cali waxay ku taalaa xuduudka gobolka Hiiraan uu la leeyahay Bakool, gaar ahaan degmada Tiyagloow.

Soomaaliya oo xoriyadii kadib ahayd 8 gobol oo kaliya ayaa dowladii kacaanka waxay mar kaliya ku dartay 10 gobol oo kale oo laga gooyey goboladii horey u jirey, waxaa sidoo kale si xad dhaaf ah loo kordhiyey degmooyinka, burburkii kadib koonfurta dalka isbadal kama dhicin, laakiin maamulada Puntland iyo Somaliland ayaa ku daray gobolo iyo degmooyin magic u yaal ah.

Waa markii ugu horeysey oo Alshabaab ay degmo u magacoowdo meel dalka ka tirsan, isla markaasina farrogaliso nidaamkii deegaanka ee horey u jirey, talaabadani waxaa lagu tilmaamay biloowga nidaam dowli ah oo ay Alshabaab Soomaaliya la dooneyso.